鮮紅映襯腥紅

「……兩名衛生督察於8月30日巡查迪士尼樂園食肆，調查一宗懷疑食物中毒個案時，被迪士尼工作人員以『避免引起公眾不安』，要求衛生督察脫帽及除下肩章。而兩名督察沒有即時請示上司，自行決定除去帽及肩章……」（《明報》2005-09-10，A02「樂園逼執法者除制服捱轟」）

唔知講乜好。

本來覺得，佢兩位一定未做過小販管理隊——果種威猛、蠻橫去左邊？但係諗深一層，才恍然大悟。若非凶悍一進入樂園已經俾笑聲溶化淨盡，就必定係衛生督察一番好心，明白樂園中既笑聲已經夠假，已經承受唔起一分一毫既挑戰，任何動搖只會導致崩潰。

而家俾人誤會，俾人良心當狗肺，係最慘既事。

記起朋友早排同我講，話佢睇到一本書話美國奧蘭多迪士尼園內發生過一次非禮案，受害者打911報警，竟然唔係接駁到警方既報案中心，而係迪士尼樂園既保安中心。

香港唔會既，樂園咁細，養唔起個high-tech既保安中心。

忽發奇想。我地國家副主席曾慶紅先生將會來港主持迪士尼樂園開幕儀式，愛黨既佢，西裝上面必然有個共產黨黨徽既小別針，迪士尼職員係咪會要求佢除下，以免引起作為美帝代表既米奇老鼠不安？

哈哈！放心啦，我國既偉大領導又點會咁無智慧同膽色，好似特區d衛生督察咁易俾人兇到！佢一定會事先自動除下別針，再靜靜咁吉個別針落米奇老鼠背脊個吊帶交叉位度，讓鮮紅映襯著腥紅。一人一鼠對著鏡頭充滿歡樂來一張大合照，留下最美一刻，寄望大家都千秋永存。而那一抹血煞，則躲藏於鏡頭之後，永遠隱沒。